Komparatif.ID, Bireuen– Uleu lhan ubé bak pineung nyang dimeu-umpung lam paya di likôt rumoh Teungku Muhammad, padim malam ka u likôt ji’ut manok agam gobnyan.
Uleu lhan nyan jiteungöh dari paya nibak teungöh malam bak saboh gampông di Matangglumpangdua, Peusangan, Bireuen. Ji’eu bacut-bacut jipeutoe geureupôh manok Teungku Muhammad yang geupeudöng di likôt rumoh.
Teungku Muhammad teukeupak lam teungeut geuh, watè geudeungö su kreu’ap kreu’ip manok.
“Sang na sipupu,” kheun gop nyan bak binoe geuh.
Beut: Keuneuk Teugom Bui, Cagè Itam Suwah Plung
Teungku Muhammad sigra geubeudöh dari peuratah. Geuraba sèntè nyang geupeuduk ateuh mèh. Geucok parang nyang meulhat bak bintéh.
Sira geuteubit röt pintô likôt, gobnyan geupeu-udép sèntè. Laju geusèntè ateuh geureupôh.
“Astagfirullah!” kheun Teungku nyan. Gobnyan teukeupak meuleumpah na meuban geukalön uleu lhan ubé bak pineung teungöh ji’ut manok agam lam geureupôh.
Malam nyan geukeuneuk tak bak ulè uleu nyan. Teuma gobnyan bagah that geukeumali. Nyoe meutumè tak, meunyoe hana? Lam seupôt klam, rumoh bak ujông dusôn. Meunyo awai jigrup gobnyan puhaba?
Teungku nyan geuteu’oh that peurangui uleue. Hana jijak peugah haba watè jikeuneuk meubut. Asai meuganggu jih mita raseuki, nyoe hana pat kilik, laju jigrup ureueng nyang toe.
Kakeuh, malam nyan manok agam ji’ut di keu mata, Teungku nyan hana pat peugah haba. Geukalön mantöng but uleu deuk nyan meucuca lam geureupôh, lagè ureueng Aceh kalön pèng Aceh nyang that jai jipajôh saboh tumpôk sapoe lé oknum elit politik, oknum elit birôkrat nyang bulô hana ujông, dan oknum awak jéh nyang lam undang-undang jibi hak droep pancuri, tapi jipeuguna fungsi nyan keu mita leubèh. Hana jipakoe haleu hareum.
Bak awak nyan nyang na hareum sie bui ngön sie asè.
Peudéh hana pat peugah, tapi taneuk lawan pih hana tatusoe pakat.
