Komparatif.ID, Bireuen—Peutuha Peureuté Aceh (PA) Wilayah Bireuen Teungku Darwis Jeunib neupeugah ureung GAM kön tukang reugam boh sôh, tapi ureung seumeusôh. Nyan neupeugah nibak acara peusapat droe keu Pilkada Bireuen 2024.
Nibak video nyang dikalön lé Komparatif.ID, Rabu (11/9/2024) Darwis Jeunib neupeugah Teungku Batee—Husaini M. Amin—yang geuangkè ke calon Bupati Bireuen uleh Peureuté Aceh nakeuh beutôi-beutôi ureueng muprang, dan beutôi-beutôi sidroe panglima.
Baca: Untuk Pilkada Bireuen 2024, PA Masih Wait and See
Darwis Jeunib neupeugah man mandum ureung hanjeut yö peumeunang Teungku Batee. Kareuna pu yang neupubut nyan nakeuh prang politik; but perjuangan. Kön politik, tapi prang politik.
“Nyoe politik jeut yö teuh. Nyoe prang politik, meusambông ngön prang awai, nyang tanyoe pubut nyoe uroe nyoe. Makajih uroenyoe puna kendala, meunyo neutumè gob dijak jôk peng, peng-peng priek,” kheun Teungku Darwis nyang katrép neuduk keu ule kawan Komite Peralihan Aceh (KPA) Wilayah Batee Iliek.
Darwis neupeugah lom, kali nyoe kön but maen-maen. Harus gasa. Ban mandum hanjeut teumakôt. Karena dilè ureung nyoe nakeuh ureung mat beudé. Ureung nyoe kön ureung reugam boh sôh, tapi ureueng seumeusôh.
“Tanyoe kön ureung reugam boh sôh, tapi ureueng seumeusôh. Na muphôm! Kon jak reugam boh sôh mantöng, beuseumeusôh, nak ta-eu sigöe kali nyoe,” kheun Darwis di Kantô Peureute Aceh Wilayah Bireuen.
Ureung agam nyang kayém ditawôk deungön nan Bang Darwis, nibak acara nyan neupeugah chiet bahwa Wali neupeusampoe meunyoe geutanyoe keunöng beudé bak jaroe, menyoe gaki mantong ék tajak, payah jak, ata nyan bèk rhet bak jaroe.
“Meunoe lom, ureung tuha, Wali na neupeugah sit, ban mandum ureung GAM nyang woe lam nanggroe beuhati-hati that. Na ureung lakè seutot gata, dijak lakè mè tah gata, watè asoe tah nyan ka jiteupu, gata akan jitinggai,” kheun Darwis.
Darwis neupeugah, keu pang ule –pemimpin—beuna akai peulandôk. Bek mudah patéh pun yang gob peugah. Kadang-kadang digob na tujuan untuk peureuleöh PA, dan ijih icok manfaat.
“Makajih uroe nyoe geutanyoe seulambông daripada perjuangan, teudöng perdamaian, teudöng saboh peureuté lokal dengon na perjuangan geutanyo, lahélah peureuté lokal laén. Tapi meunan lahé kön jipeuköng geutanyoe, tapi jipeupuh geutanyoe. Tapi insyaaalah, meunyo geutanyoe mantöng köng, mantöng jiwa seumangat GAM, mantöng jiwa seumangat prang, insyallah kemenangan nyoe akan tatumè sit.”
Darwis Jeunib neupeugah lom, “Uroe nyoe ka lôn pulang bak ureung droeneuh. Nyang peunténg singöh bek sampe na haba, hana geupeugah sapue lé Bang. Uroenyoe ka tapeutrang bak droneuh mandum. Insyallah but geutanyoe akan meuhasé. Geutanyoe bèk yö keu bayangan laén.”
Darwis Jeunib neupeugah sit, meunyoe mantöng aneuk droe, keupu tacok aneuk gob. Kalheuh meupeujaroe bak gob padim thôn ka u likôt, mandum tujuan peukaya droe. Makajih uroe nyoe, cok aneuk droe. Peukara meunang nyan peukara laén.
Meunan sit keu pilkada Aceh, Mualem dan Dek Fadh harus peumeunang, kareuna ban dua ureueng nyang na lam seuh prang, nak leubèh jroeh Aceh ukeu.
“Dan taharap singöh nibak pemimpin, point-point dalam MoU [Helsinki] yang golom seuleusoe, perjuangkan nyan, kamoe na dilikôt, menyoe kön jalan nyan tateumpuh, tanyoe han seujahtra. Kareuna nyoe taharap pèng nibak Pusat, nyan keuh lage-lage nyoe sabé,” kheun Darwis Jeunib.
