Komparatif.ID– Na saboh cagè itam raya, jikeuneuk teugom bui lam weu nibak saboh nanggroe nyang hana tatupat lé geutanyoe.
Lam saboh video nyang Komparatif.ID kalön nibak uroe Aleuhad, tanggai 2 Maret 2025, na saboh cagè itam raya, jitamöng lam weu bui. Lam pageu weu nyan na saboh bui putéh tumbôn, teungöh jiseumajôh.
Meuröhröh ibabah cagè nyan. Lam pikèran jih, nyoe kapah. Kana maidah keu seupôt nyan. Bui putéh raya lam lampôh weu nyan, that tari. Sép keu nam uroe pajôh.
Cagè nyan sigra ji-ék lageu kawat. Bhah ék pageu cit hana jeut halangan bak cagè. Meulatang meu-ukè dan meutaring nyan cit caröng that grôp pageu. Meulatang nyan bak kayè jeut ji-ék. Meunan geubri lë Tuhan, nak bèk maté deuk jih.
Cagè meulatang nyang jeut pajôh sie, dan jeut pajôh seulaman. Meunyoe hana jitumè meulatang laén keu makanan, jih jijak pri’ek gu u, dan laén seubagoejih.
Beut: Pertamina: Pertamax Aseuli, Ureueng Gampông: Pu Jipruk Bak Tanyoe
Tagisa lom bak cagè nyang hawa that jikalön bui tumbôn. Lheuh leupah jitamöng u dalam pageu weu, sigra jitajô ateuh bui putéh nyan.
Rupari bui nyan pih kasiap. Pu nyang jeut kakeuh jeut. Pokokjih uroenyan bui putéh nyan jilawan cagè. Watè cage jipeurap, bui nyan laju jitajô jitugom bak prut cage.
Cagè nyan teukeupak aruwah jih. Jéh? Pakön bui nyoe beuhe that? Meunan kira-kira lam pikiran jih.
Teungöh jiuseuha beuleupah jikap bui putéh, tiba-tiba bui itam nyang lam weu pih jiteubit. Sira jiplung jipök cagè nyan sampoe meusoksok lam sagoe bintéh kawat.
Meuban jikalön ban dua bui nyan hana yö keujih, cagè nyan hanalé jimita sungkap. Laju ji-ék pageu jiplung u luwa.
Ureueng nyang kalön video nyan neupeugah h’öng datdat na umu na umat. Nyoe bak adat, teuntè bui nyan kabéh jih. Tapi nyoe mantöng na umu, nakeuh cara.
