Komparatif.ID, Jakarta– Pertamina jipeugah minyeuk Pertamax nyang geutanyoe bloe bak galon (SPBU) nakeuh Pertamax aseuli. Kilang Pertamina di Indonesia hanjeut jingui keu teumpat jampu minyeuk lagè jituléh lam koran.
Wakie Presiden PT Pertamina Bideung Corporate Communication Fadjar Joko Santoso, Seulasa, 25 Februari 2025, jipeugah bak wartawan h’an mungkén kilang minyeuk di Indonesia jeut jipeulaku nyan. Pakön meunan? Kilang minyeuk di Indonesia karap ban mandum umu jih ka tuha.
Si Fadjar Joko Santoso jipeugah [wartawan] salah meuphôm pu nyang jipeusampoe lé Kejagung watè jidrop Dirut PT Pertamina Patra Niaga Riva Siahaan.
“Haba minyeuk kolak nyan hana saban ngön pu nyang jipeugah lé Kejagung,” kheun Fadjar.
Kheun si Fadjar, bhah nyang jeut keu peukara nyang disidék Kejagung nakeuh peukara bloe Ron 90 dan Ron 92. Jadi kön bhah kolak Pertalite jeut keu Pertamax.
Ijih jipeugah lom bak wartawan, ureueng poe honda ngön moto bèk chök nyang könkön keu Pertamina. Minyeuk Pertamax nyang geubloe bak galon dari Sabang sampoe Meurauke, ban mandum göt, kapah lagè spèk nyang jituléh ateuh keureutah.
Beut: Si Riva Siahaan Budôk, Jipeungeut Ban Saboh Indonesia
Dari awai sampoe jino, minyeuk nyang jipubloe lé Pertamina keu ureueng ramè lam nanggroe Indonesia, kwalitet jih lam kawai Lembaga Minyak dan Gas (Lemigas) di miyup Kementerian Energi dan Sumber Daya Mineral.
“Ulôn peusampoe nibak ureueng droneuh ban mandum, ban sigom Indonesia, minyeuk Pertamax nyang kamoe publoe, kwalitet jih ban mandum lagè meutuléh ateuh keureutah. Hana kamoe peungeut,” kheun Fadjar.
Teuma peukara Riva Siahaan nyang peutamöng minyeuk lua nanggroe, Pertamina jipeugah bahwa sampoe jino kilang-kilang minyeuk nyang na lam nanggroe, hana keumah lom olah minyeuk bumoe jeut keu meumacam bagoe barang. Jadi galak hana galak, crude oil (minyeuk meuntah) suwah ba u luwa.
“Jadi hana mungkén jeut jijak kolak minyeuk Pertalite jeut keu Pertamax. Kilang bak geutanyoe jai nyang mantöng ata jameun,” kheun si Fadjar.
Peukara jipeugah Riva Siahaan jimeuolah, h’an jitung minyeuk wasé keurija KKKS lam nanggroe dengön macam bagoe alasan, Fadjar peugah nyan hana mungkén. Seubab sampoe jinoe jumeulah minyeuk nyang meuasai dari kilang lam nanggroe, golom sép keu droteuh. Pertamina sampoe jino mantöng suwah bloe minyeuk dari luwa.
“Geutanyo di Indonesia, jumeulah minyek nyang tacok keudroe teuh gohlom sép. Kareuna nyan suwah bloe dari luwa,” kheun jih.
Adak pih si Fadjar jipeugah nyan meukuboh ibabah jih, lheuh Kejagung jibeureukah Riva Siahaan, ureueng nyang beut bhah nyan bak koran, hana nyang patéh.
“Puka jijak baca hikayat uleu si Fadjar nyan. Soe nyang kajak patéh. Ikè ngön keunue kudeungö,” kheun Teungku Nu, ureueng tuha di Banda Aceh. Nyan geukheun lé gob nyan watè geujép kupi nibak saboh keudè di Syiah Kuala, Seulasa (25/2/2025) malam.
Meunan sit ureueng laén lam Facebook dan WA. Pu nyang jipeugah lé Pertamina, hana soe patéh.
“Itanyoe cit dari awai kachök teuh keunöng peungeut bhah bénsén, Pertalite dan Pertamax. Teuma ban tateupu lom na tamah kolak lom di dalam, tajak patéh lom rabôn jalé Pertamina?,” keuh Burhanuddin, ureueng tuha lam saboh grub WA.
Meunan cit si Reza maen bhan. Ijih ubé raya jikhém ban jideungo si Fadjar peugah haba. “Pu jipruk ijih. Pu jijak pruk nyan bak tanyoe. Nyan jén saboh geudông, muruwa saboh paya ngön si Riva Siahaan jéh,” kheun si Reza.
Dosen UIN Ar Raniry Muazzinah Yakob neutuléh bak bintéh Facebook, keubit that brat rugoe ureueng nyang bôh Pertamax, deungön meukeusut keuneuk bantu nanggroe. Rupari ka keunöng peungeut lé awak Pertamina keudroe.
Muazzinah nakeuh sidroe pensyarah di Ar-Raniry, nyang kayém keureuja leubèh keu ureueng ramè. Gob nyan na lam kawan ureueng bôh Pertamax keu minyeuk moto nyang geungui siuroe-uroe.
Nyang leubéh peudéh kheun si Dahri, awak Juli nyang kayém duk bak keudè kupi. “Pat peujabat rayek di Indonesia nyoe nyang hana sulét? Aci tunyok siat. Jadi bèk kheun sapu keu Pertamina. Awak nyan nyoe hana diceumeucu, jitakôt cuco jih hana jiteupu pajôh.
“Meunyoe jih Iseulam, nyoena jitobat watè pansiôn. Jak rata jamaah suboh. Kirém-kirém tausyiah lam grub WA. Bagi-bagi bu bungkôh keu ureung bak jalan. Nyang hareuta hareum teutap h’an jiböh. Nyoe jih kaphé, kakeuh lagè haba nyan laju,” kheun si Dahri sira jipeugah yum gah lhè kilo ka ji-ék lom bak keudè jih bloe gah
