Komparatif.ID, Jakarta– Biasajih pancuri tujôh dari ureueng gasin atawa ureueng putôh prut. Tapi kali nyoe pancuri tujôh nyan nakeuh Dirut Pertamina Patra Niaga Riva Siahaan. Sigam nyan jikolak minyeuk pertalite jeut keu pertamax.
Si Riva Siahaan nyan kön sigö dua gö jipubut but meuilanya ureueng ramè dan peurugoe nanggroe. But sulét nyan kajipubut lé si Riva Siahaan dari thôn 2018 sampoe 2023. Meunyoe ureueng droneuh na pernah neupeugah minyeuk pertamax hanagöt bak saboh masa dilè, nyan keuh but aneuk kleung baphö nyan.
Nyoe ureueng bulô memang hansép-sép. Padahai ijih sép brat ka kaya. Sampoe 31 Maret 2024, jumeulah harta jih nyang jilapôr nibak KPK nakeuh Rp18,9 miliar. Nyan nyang jilapôr, hana tateupu nyang hana jilapôr bak KPK. Kadang sit meuleumpah jai lom. Ureueng-ureueng meunan pat that jeut tajak patéh. Sulét sit ka ban saboh tubôh jih.
Beut: Jicabôt Sikula, Polisi Beureukah Aneuk SMA di Banda Aceh
Taneuk kheun hana jiteupu but nyan salah, hana mungkén. Ijih panyang jijak sikula. Kön ureueng buta huruh. Takheun hana jeut ngui, hana mungkén jitumè duk keu Dirut Pertamina Patra Niaga. Teuntè ureueng nyang duk bak kurusi nyan kön cilèt-cilèt. Hana mungkén ureueng ngeut ujông, bukruk, sulét, jijak peuduk bak kurusi peutimang nanggroe.
Tapi kakeuh meunan. Di Indonesia nyoe pu nyang han mungkén. Dumpu jeut jipeulaku. Nyang peunténg “wani piro”.
Tagisa keulayi nibak but haramjadéh jih. Si Riva kajimeuolah nibak Pertamina Patra Niaga mulai thôn 2018. Ijih jikeurija ngön nam droe teuk rakan jih nyang na lam donya minyeuk tanoh dan gah.
Lam but awak nyan, jibloe minyeuk pertalite oktan Ron 90, lheuh nyan jipasoe lam tangki raya di Pertamina. Wasé dari jampu nyan jeut keu pertamax Ron 92.
But jampu-jampu minyeuk nyan, nyoe jikheun lé awak nyoe di Aceh, minyeuk kolak. Dilè ramè awak Aceh nyang kolak minyeuk. Bensén jijampu minyeuk gah. Solar jijampu minyeuk gah. Pakön jikolak? Karena watè nyan di Aceh teungöh karu raya antara Indonesia ngon GAM. Awak teuntra dan brimob di binéh jalan jilakè peng bak awak moto, jicorot minyeuk lam tangki moto, dll. Nak bèk rugoe, maka jiolah lah minyeuk nyan.
Teuma si Riva Siahaan soe nyang kajak corot minyeuk jih? Soe nyang kajak teujeut lakè hak reman bak jih? Pakön teuma jitém pubut? Nyan bèk neujak tanyöng. Kecuali droneuh trép tinggai di Eropa barat. Nyoe droneuh lahe di Aceh dan rayek di Indonesia, ajè gilè aja lô kagak tahu.
Lheuh jikolak minyeuk, si Riva Siahaan nyan jiepeugöt bôn, jituléh lam bôn nyan ijih jibloe minyeuk pertamax Ron 92. Bit meujadéh but jih.
Lheuh nyan lom, ijih nak jitumè laba rayek lom, han jitung minyeuk nyang dicok lam mon minyeuk lam nanggroe. Macam alasan jipeugöt, meunoe lah, meudéh lah. Pokok jih han jitung minyeuk nyang jipasoe lé kontraktor kontrak kerja sama (KKKS) nyang keurija di Indonesia.
Gara-gara but jih nyan, minyeuk wasé lam nanggroe, jipubloe u luwa. Lheuh nyan, untuk minyeuk lam nanggroe, jibloe dari lua nanggroe, atawa jicok dari minyeuk nyang na bak kilang Pertamina Internasional di lua.
Bèk neujak tanyöng, dipna pancuri tujôh nyan jitumè laba. Meukuyan-kuyan lah. Pokok jih, nyoe taduk bak keudè kupi di Banda Aceh, sigoe jih meubut, meubeuleuen tatumè bayeu ie ureueng ban saboh Banda Aceh. Nyan ka jitamöng kuenira pajôh bu guri, bu saté Tubaka di Matang, pajôh mie bieng, dan seubagoe jih.
Jinoe si Riva Siahaan kajibeureukah lé Kejaksaan Agung RI di Jakarta. Ijih kajipeusôk bajè wareuna mirah jambu. Watè jiba u luwa, jaroe jih jigari, babah ngön idông jih teutôp masker. Stelan mantöng modislah. Pancuri rayek panena jicukô ôk, panèna jitimbak bak boh pha. Adak sampoe jisak lam sel teutap deuh modis.
Pajan teuma jih jidroep? Si Riva Siahaan jidrop nibak uroe Seulasa, tanggai 25, Buleuen Februari 2025.
Lagè-lagè jih meulimöng hana yö jipasoe lam glap. Kareuna pasti meutumè tutôpan nyang na AC, TV, kulkas, springbed, jeut ba inong u dalam, jeut teubit pajan nyang galak. Saboh teuk, biasajih, hareuta wasé jiceumeucu hana mandum jicok keu nanggroe. Lheuh cang keucubét, sép jai tinggai keudroe jih. Jeut jimeu-udép kaya raya sampoe cah cong jih.
Teuma geutanyoe nyang keunöng peungeut ban saboh tubôh teuh, geutanyoe nyang bloe minyeuk, watè tabôh pertamax, rupajih pertalite. P’up chok jih di Riva budôk antôk nyan.
