Arti thank you jeut meu-ubah wap saboh keujadian di saboh gampông di Aceh Jaya. Keujadian nyan na padum buleuen lheuh geumpa bumo dan ie beuna yang jisampoh Aceh nibak uroe Aleuhad, tanggai 26 Desember thôn 2004.
Kisah nyoe geupeusampoe lé Muchlis Rama, nyang nibak watè nyan geukeurija nibak saboh NGO lua nanggroe nyang teungöh keurija puga gampông di Aceh Jaya.
Kiban calitra jih? Meunoe. Nibak saboh uroe sidroe bulèk NGO jijak wét-wét gampông. Jih dan aneuk buah jih jak paréksa proyèk nyang teungöh awak nyan keurija.
Uroe nyan matauroe meuleumpah tarék. Nyoe ta adèe karéng laju thô lam siuroe. Meunan kha matauroe. Bulèk NGO nyan jikalön u muda jicông bak u di binèh laôt.
Ijih hawa that jikeuneuk jép ie u muda. Reukung jih ka meuleumpah thô.
“Muchlis,ka mita ureueng ék u siat. Droe kuh that grah ka,” kheun bulek nyan.
Muchlis sigra jijak mita. Nak bèk puh that, ijih sigra jijak meureumpök keuchik.
Baca: Na Hawa Keu Gurè Basa Aceh? Jak Kuliah Bak UNIKI
Pak Keuchik laju geujak hei sidroe ureueng gampông nyang but siuroe-uroe ék u. But ék u adak pih takalön hana puh, tapi keubit puh. Makajih hana mandum ureueng jeut ék u. Nyang ramè ureueng jeut nakeuh ék u reubah.
Takheun laju nan ureueng ék u nyan Apa Leman. Ureueng agam nyan umum karap 50 thôn. Igop nyan hana that muphôm basa Indonesia. Pulom basa Inggréh, teuntè meubacut hana geuteupu. Igop Nyan nyang pah sit tok basa Aceh.
Wap nyang yu sidroe bulèk, Apa Leman teuka me-ung bacut. Uroe tarék beukah ulè buya hana geujak kira.
Pulom geukalön bulèk nyan meuanggôk-anggôk wate jikalön Apa Leman sôk seureungkeut bak gaki. Meutamah ji ék mè-ung Apa Leman.
Lagè aneuk muda bak film India, hana trép lheuh nyan, saboh mu u muda kalheuh geupöt.
Lheuh geutren u miyup bak, laju geutak u, dan geujôk keu bulèk NGO.
Lheuh jijép ie u, bulèk nyan jiculok jaroe lam kéh luweu. Jisut peng 100 dolar Amerika Syarikat.
Sira ijôk pèng jikheun, “thank you.”
Apa Leman hana geuteupu areuti thank you. Apa Leman geujak tanyöng bak keuchik.
“Pak Keuchik, pu areuti nyang jikheun satnyoe?” tanyöng Apa Leman.
Meunan geuteupu Apa Leman hana jiteupu areuti thank you, Pak Keuchik sigra jitimoh akai kolak.
“Ôôô nyan thank you. Areuti jih pèng nyan jiyu bagi dua teuh. Droe keuh 50, lôn 50,” jaweub Pak Keuchik.
Muchlis nyang mantöng jidöng di binèh ureueng nyan, teuseuh’èh bak jidöng. Lheuh ureueng nyan dua jak woe, ijih meuputi prut bak jikhém.
