Komparatif.ID, Banda Aceh– Danurfan, po keude kupi Leuser di Lampineung, Banda Aceh, geubri kupi pré keu ureung beut bak malam puasa di meuseujid atawa di meunasah.
Keurija bagi-bagi kupi pré nyan jipeugöt lé Danurfan (Gem) meukeusud haté nak meutamah phala nibak buleuen Ramadan.
“Ureueng nyoe kageutém jak meudarôh di meuseujit atawa di meulasah. Lôn bri kupi saboh cawan sapoe, kön han bangkrôt lôn,” kheun Danurfan, Seulanyan (3/3/2025) malam.
Jipeugah lé Danurfan, soe mantöng peureulè kupi untuk meudarôh malam, jeut ba teurèmoh bak Keude Kupi Leuser. Meunyoe hawa kupi susu atawa sanger, ba susu keudroe. Eunteuk teuka bak Leuser, jeut Danurfan cawö lam kupi arabica nyang na bak keudè nyan.
Beut: Keuneuk Teugom Bui, Cagè Itam Suwah Plung
Danurfan peugah, soe mantöng di wilayah Banda Aceh, nyang peureulè kupi keubeut malam bak meulasah atawa bak meuseujid, ba laju teurèmoh bak Leuser. Danurfan dan rakan sigra geupeugöt kupi keu ureung droneuh.
Danurfan, nakeuh sidroe aneuk muda di Aceh nyang buka keudè kupi espresso di Lampineung. Seulaén meukat kupi, Danurfan meukat bubôk kupi. Bubôk kupi cap Leuser nyan, jino jibloe sampoe u Eropa dan Amerika.
Sigohlom jipeugöt keurija bagi-bagi kupi keu ureueng meudarôh malam, Danurfan nibak wate Covid-19, jibagi kupi pré keu awak rumoh sakét di Banda Aceh, keluarga ureueng sakét, dan soe-soe mantöng nyang hawa kupi tapi hana pèng nibak masa nyan.
Bubôk kupi Leuser asai jih dari Tanoh Gayo nyang memang jithè lé kaphé seubagoe salah saboh kupi paléng göt di donya. Soe mantöng nyang katom jép kupi bak Leuser, meumakna kalheuh jép kupi paléng hayeu di donya.
Di Banda Aceh, ureueng nyang teu’oh kupi sampoe bak rasa paléng halôh, kayém geujak jép kupi bak Leuser. Karena sinan nyang dimeukat bitbit kupi lumbôi sa nyang na di Aceh.
