Jak Kalön Bui Laôt, 13 Droe Wartawan Leumik Lam Laôt Sabang

Komparatif.ID, Sabang– 13 droe wartawan Aceh nibak uroe Seulasa (17/12/2024) dijak kalön bui laôt (dolphin) di Laôt Sabang. Awak nyoe ji-ék bôt kawè nyang kayém jingui jak intat ureueng kalön bui laôt (lumba-lumba).

Awak nyoe ji-ék bôt nibak poh siteungöh tujôh beungöh. Dari hotel sampoe teuka u Pelabuhan Sabang Merauke, awan itam jipeupayông Pulo Wèh.

15 minèt phôn, bôt kawè jilangue ie laôt lagè eungkôt surè meulangu. Wartawan meukra sabé keudroe lam bôt kawé. Macam calitra dipeugah sigoe sapoe.

Mata awak nyoe siat-siat kalön u laôt. Jimita pat bui laôt meulangu sira jigrôp-grôp ateuh ie lagè biasa. Bui laôt sirkus dan bui laôt alam hana bida lam peurangui.

Teungóh awak nyoe mangat kalön pat na deuh bui laôt, bôt kawé tuha nyan maté teuma. Asap putéh jiteupit dari lam kama meusén. Jipeugah lé nakhoda, keunepot bôt ka patah. Meunyoe jipaksa jak, ie laôt jitamóng lam meusén.

Phôn-phôn hana peukara sapue. Ban mandum wartawan mantöng khém-khém. Na siplôh meunèt lheuh nyan, sidroe-droe teuka hana mangat badan.

Wahyu, wartawan inong asai Aceh Seulatan, ka mulai mumang. Kôk jih ka meuri hana mangat. Jih jijak duk laju u dalam caruk ulè bôt. Syarkawi, wartawan asai Aceh Utara, hana trép nibak nyan pih teuka hana mangat asoe. Asoe pruet lagè dikeuneuk teubit.

Hana trép lheuh nyan, Wahyu dan Syarkawi muntah ban dua. Ak-uk ak-uk lam bôt. Man dua awak nyoe jiteubit muntah kunèng. Bu guri nyang lheuh jipajôh siteungóh jeum sigohlom jih, ban mandum jiteubit.

Na sijeum awak nyoe meuputie prut lam bôt kawé nyan. Nyang peugöt awak nyoe mumang kareuna geulumbang teuka dari peut boh mata angèn. Bôt ubeuet nyan ji-ék jitren ateuh geulumbang. Makén kayém geulumbang, makén mumang awak nyoe lam bôt nyan.

Sijeum lheuh nyan teuka speed boat jak tueng. Ban mandum wartawan teuseungèh-seungèh. Hana trép kheuh nyan, awak nyoe jibaplung u Pulo Rubiah jak nom sira kalön eungkôt tari-tari lam laôt di Rubiah.

Teuka u Rubiah, awak teuduk-duk ateuh kurusi. Awak peutimang badan dilè, sigohlom jak nom (snorkling) bak binèh Panté Pulo Rubiah.