Komparatif.ID, Banda Aceh– Briptu Kevin Hidayatullah keubit jeut tacok keu meulintè. Meunan geukheun lé ureueng teupu, wap polisi muda nyan jitém seumeubeut tiep uroe Jumeu’at seupôt nibak Meuseujid Raya Baiturrahman, Banda Aceh.
Soe teuma Kevin Hidayatullah nyan? Aneuk muda nyan lahé nibak thôn 1998. Nibak watè nyan Indonesia teungöh krisis moneter, dan Presiden Suharto rhet dari kurusi Presiden Indonesia.
Kevin rayek lam keuadaan Aceh ruyang rayoe wap prang panyang antara GAM ngön Pemerintah Indonesia. Banda Aceh seubagoe pusat pemerentahan, tiep uroe kalang-kalôt moto teuntra dan moto brimob. Su keuneupot moto awak nyan pu tanyoeng, lagè lam film Rambo.
Teuma wap Kevin mantöng mirah nibak masa nyan, teuntè ijih hana jikalön kiban phak luyak teuh watè nyan. Kevin rayek watè Aceh ka damè.
Kevin leupah keu polisi nibak thôn 2016, lheuh tamat sikula peugöt bentara (diktukba) Polri Sikula Polisi Neugara (SPN) Seulawah.
Brigadir Kevin dari ubeut ka geupeuturi Quruan lé ureueng chiek jih. Jadi polisi muda nyan hana aséng ngön kalamullah.
Beut: Mubadala Energy Seudeukah 5 Boh Leumo Keu Makmeugang Uroe Raya Puasa 1446 H
Tiep uroe Jumeu’at seupôt, Briptu Kevin nyang tamat SMK Negeri 1 Banda Aceh, jak peubeut aneuk mit cut cut di Meuseujid Raya Baiturrahman. Lheuh woe kantô, ijih laju jilangkah u meuseujid. Jigantoe bajè, dan jiphop laju sajan aneuk mit beut.
Nibak Satu (15/3/2025) Kevin jipeugah ijih jitém seumeubeut wap raya that phala geubri lé Allah. Soe mantöng nyang na ileumè dan tém seumeubeut, tiep harah Quruan nyang jipeurunoe keu ureueng laén, neubrie lé Allah 10 nyang göt. Cibayang ngön tapeuruno bismillah mantöng sép jai ka phala.
But nyang jipeulaku lé Kevin, geupujoe lé ureueng nyang na di Meuseujid Raya nyan. Teuma watè geupujoe meunan, Kevin jipeugah polisi nakeuh asai jih dari ureung nyoe sit (rakyat). Pulom lam bhah tanggông jaweub, polisi na tugah beujeut keu conto nyang jroeh lam masyarakat.
