Komparatif.ID, Banda Aceh– Presiden Direktur Mubadala Energy Indonesia Abdulla Bu Ali, ijôk limöng boh leumo bak jaroe Waki Ule Pemerintah Aceh Fadhlullah bak kama ureueng peunténg that (VIP) bak Bandar Udara Internasional Sultan Iskandar Muda, Blang Bintang, Aceh Rayek, Seulasa (10/3/2025).
Presdir Mubadala Energy Indonesia Abdulla Bu Ali, jipeugah bak Dek Fadh, leumo nyang awak nyan jôk jiyu bagi-bagi keu ureueng Aceh nyang Iseulam dan na pajôh sie makmeugang nibak makmeugang Uroe Raya Puasa 1446 H.
Waki Ule Pemerintah Aceh Dek Fadh, watè jiteurimöng seudeukah nyan jikheun Pemerintah Aceh ka meuteurimöng amanah, eunteuk ‘oh ka trôh watè, sigra jibagi keu ubéna ureueng nyang jeut teurimöng seudeukah sie makmeugang dari Mubadala Energy Indonesia.
Beut: Saiful Amri Meukat Èh Bandông Tip Buleuen Puasa
Dua uroe ka u likôt, Duta Rayek Uni Emirat Arab (UEA) Abdulla Salem Al Dhaheri, Presdir Mubadala Energy Abdulla Bu Ali, teuka ijak u Aceh. Awak nyan jijak meureumpök Ule Pemerintah Aceh Teungku H. Muzakir Manaf, dan Wali Nanggroe Aceh Paduka Yang Mulia Malik Mahmud al Haytar.
Utôsan UEA nyan jijak u Aceh lam bhah jak peuköng pupu nyang kalheuh jipeugah sigohlom jih deungön Mualem. Mulai dari bhah cok minyeuk dan gah lam pruet bumo, sampoe jalan tol.
Di Aceh awak nyan jibuka puasa ngön Wali Nanggroe Aceh, pula aneuk kayè nyang jeut pöt boh nibak masa ukeu.
Wali neupeuturi bak awak nyan meubagoe macam bak kayè meuboh di Aceh yang geupula bak leun Meuligoe Wali.
