Komparatif.ID, Banda Aceh— Soe mantöng nyang hawa beujeut keu gurèe basa Aceh di rumoh sikula, nyoe kana peuluweung. Universitas Bina Bangsa Getsemena (UBBG) ka jibuka jurusan Bahasa Aceh dan Sastra Aceh. Meunan geupeugah le Rektor UBBG Prof. Dr. Hj. Lili Kusmini, Rabu, tanggai 20 Agustus 2025. Gurèe Chiek nyan neupeugah jurusan nyan ka jimulai tueng mahasiswa barô nibak thôn nyoe.
“Nyoe nakeuh useuha kamoe di UBBG, meukeusud haté kamoe, bahasa Aceh beuleubèh keumang lom di gampông droeteuh. Pulom ban mandum tanyoe tateupu basa Aceh karap reulé,” kheun Lili Kusmini.
Nibak jurusan nyan, mahasiswa kön tok jiepurunoe bahasa Aceh, tapi jipeurunoe sit sastra Aceh. Jadi eunteuk sarjana nyang tamat bak jurusan nyan, jeut jipeurunoe aneuk mit bak rumoh-rumoh sikula nyang na lam nanggroe geutanyoe.
“Awak nyoe singöh, watèe ka tamat ji kuliah, jeut jijak peurunoe aneuk mit bak rumoh sikula. Awak nyoe keuh nyang eunteuk jeut keu ureueng jaga bahasa dan satsra Aceh,” kheu gop nyan.
Lili geupeusampoe sabah meuluwah raya keu peujabat di LLDikti XIII Aceh, Yayasan Pendidikan Getsempena, ureung-ureueng kampus di UBBG, dan ban mandum waréh kaŵom nyang ka geujak brie peulurông, sampoe jurusan Pendidikan Bahasa dan Sastra Aceh lahe di UBBG.
Gop nyan geupeugah sit, u keu nyoe, di Aceh makén jai jipeureulèe gurèe bahasa Aceh di rumoh-rumoh sikula. Pakön meunan? Wap ban mandum rumoh sikula suwah na gurèe bahasa dan sastra Aceh.
Peutuha Chiek Peutimang Yayasan Pendidikan Getsempana, Ir. H. Hidayatullah Daud, neupeugah igop nyan neubri rauh keu program studi Pendidikan Bahasa dan Sastra Aceh.
“̃Nyoe nyang ka tapubut, ka lagèe amanah Qanun Lumboi 10 Thôn 2022 bhah Bahasa Aceh. UBBG harök that beujeut keu pihak nyang peutimang, jaga, dan peukeumang bahasa Aceh,” kheun Hidayatullah.
