Komparatif.ID, Banda Aceh– Saiful Amri, sidroe gurè bak MIN Lambhuk, Banda Aceh, tiep buleuen Puasa nagemeukat èh bandông Bireuen. Jinoe gobnyan meukat tiep seupôt nibak binèh jalan, hana jiôh dari Gudang JRG.
Gure MIN Lambhuk asai Juli Keude Dua, Bireuen nyan, lam peukara but jaroe jeut bacut sapu. Meunyo uroe Aleuhad di luwa buleuen Puasa, geutet pulôt di rumoh geuh. Biasajih 200 boh pulôt geutet dua ngön binoe geuh.
Teuma nyoe buleuen Puasa, leubèh mangat meukat èh bandông, sira peulalè puasa, crông-crông èh bandông lam galéng atom bôh lam paruk.
Sigohlom jih, yum saboh paruk èh bandông bak gobnyan Rp5000 saboh paruk. Jino ka 8000 rupia. Dua boh paruk 15 ribè. “Hana cara lé tapubloe 5000. Yum u ka meuhai juju. Yum saka ji-ék,” kheun Saiful, Sabtu (1/3/2025) seupôt.
Beut: Leuser Bagi Kupi Pré keu Ureung Meudarôh Malam Puasa
Ramè ureueng peugah nyum èh bandông nyang geumeukat lé Sekretaris Ikatan Keluarga Masyarakat Juli (Ikmali) nyan mangat. Mamèh hana that, leumak jih pih pah.
Èh bandông nyan abéh tip uroe. Malahan kayém h’ansép. Pulom lawét nyoe. Ureueng nyoe ka awai geuyu kubah saboh atawa dua boh sapoe. Meunan lapak geubuka, c’hap-c’hup ju lagôt. Meujan-jan sit suwah prèh karena meusigö jak cok.
Haba nyang Komparatif.ID teupu, Saiful Amri hana puh lé meukat ie nyan. Seubab kana ureueng bloe. Mulai ureueng Juli nyang na di Banda Aceh, ureueng Bireuen nyang di Banda Aceh, atawa ureueng sidroe sapat nyang hawa keu èh bandông Bireuen.
Saiful Amri kayém cit geupegah keu conto lé ureueng tuha, peukara kiban jak meuranto. Dilè geujak u Banda jak mita keurija. Teuma watè geuwoe ka geupuwoe titél sarjana. Lheueh nyan jeut keu guru negara, meugatip ngön dara Aceh nyang ureueng chiek geuh geuduk di lua Aceh.
