Komparatif.ID, San Fransisco: Lagè teuthok tuwö. Kapai United Airlines nyang jiphö dari Los Angeles u Shanghai, China, suwah puta keulayi u Amerika wap pilot jih hana jiba passport.
Nibak uroe Sabtu, (22/3/2025) poh 2.00 cöt uroe, kapai United Airlines 198 kajiphö dari Los Angeles. Kapai nyan jiba 257 droe penumpang dan 13 droe awak kapai. Nibak teungöh rauh lam awan putéh, rupajih pilot ka hana jiba passport sajan jih. Pu tapeugah teuma, lam sigra kapai meutuwah nyan suwah puta keulayi, jipiyôh di San Fransisco.
Baca: Keuneuk Teugom Bui, Cagè Itam Suwah Plung
Kapai United Airlines nyan teuka jitren u Bandara San Fransico nibak poh 05.00 seupôt.
Adak pih kalheuh jibi thè bak penumpang, pu tatanyöng, saré meupèppèp ureueng lam kapai. Awak nyan jikheun sikrèk sapu keu pilot.
Teuka u Bandara San Fransisco, penumpang suwah prèh nam jeum, sampoe kapai jiphö lom u Shanghai. Keu penumpang jibagi dua krèk sapoe kupon nyang yum jih 30 US dollar. Kupon nyan jeut tuka keu cok peunajôh nyang lazém jibagi asai kapai teulat jiphö.
Yang Shuhan hana jipeulheuh angén. Ijih meuleupah palak jih, wap pilot bulut sidroe, ijih teulat trôh u Shanghai. Teuka u Shanghai, Yang Shuhan sigra jituléh protèh bak wèbsitè United Airlines.
“Kamoe suwah prèh sampoe nam jeum. H’anjeut keuraka’at. Pu kompensasi nyang jipeutaba keu geulantoe salah rayek nyan?” Kheun Yang Shuhan.
Awak kapai nyan jibalah pu nyang Yang Shuhan peugah. Awak kapai jilakè meu’ah ateuh peukara nyang ka keujadian. Awak nyan pih hana jisangka ata meunan.
Kön Yang Shuhan sagai nyang beungèh. Rap mandum penumpang icah. Bak aplikasi China RedNote, awak nyan jituléh keubit beungèh that keu pilot bulut nyang hana jiba passport.
“Alèh pu jipeusèt si pilot bulut nyan. Hana tom igop na bak jih,” kheun awak laén nyang teulat trôh u Shanghai.
