Komparatif ID– Pakön taring bui tajam meuleupah na? Leupah jisudok peureudè u, leupah diphok tanoh cak glé nyang kreuh lagoina.
Lam saboh video nyang dipeuduk bak salah saboh media sosial lé poe akun, jipeuleumah kiban cara bui peutajam gigoe jih, nak jeut jingui keu pupu mantöng watè bui meujak mita raseuki.
Baca: Babi Janggut, Sus Barbatus yang Memesona
Bui biasa jih jijak meuranteut ‘oh malam. Bui meuwét-wét lam lampôh. Pupu nyang meurumpök, asai jeut pajôh, jiteumök saja. Pukeuh peureudè u ubeut, peureudè pisang, peureudè sawét, dan seubagojih. Bui jipajôh sit meulatang lagè manok, atawa meulatang laén. Lam istilah ilmè hayat jikheun omnivara; jipajôh pupu nyang na.
Bui kayém sit jipajôh èk droejih, dan ‘iek droejih.
Makajih ureueng nyang hana turi haleu hareum kayém geupeusaban lagè bui. Ureueng nyang meutabi’at lagè bui hanjeut tung keu syedara. Meunan geupeugah lé ureueng awai.
Tagisa keulayi lom nibak bhah bui asah gigoe. Kiban cara bui asah gigoe?
Meulatang nyan na taring. Taring nyan dingui keu mata langai watè jisudok tanoh cak. Jingui keu parang watè jikap meulatang atawa ureueng. Intijih keuneuk peugah, meulatang nyan nyoe hana taring kakeuh hana keumah jijak mita umpeun pu nyang galak jih.
Karena kayém jingui, teuntè taring meulatang jeut keu tumpôi. Watè katumpôi ka puh jipubut but droejih.
Sira jipiyôh hèk, sira jidukduk lam kubang, bui jiasah gigoe jih. Kiban cara jih asah gigoe? Nakeuh taring miyup jipeupleu ngon gigo ateuh. That tajam cara jipleu. Seungké teuh nyoe tadeungo. Nyoe lam but geutanyoe manusia geukheun kr’öt-kr’öt gigoe.
Bui nyan lam agama geutanyoe cit meulatang nyang geuyu peujiôh. Bui hanjeut pajôh, hareum that-that. Ban saboh badan jih meunajih. Menyoe meupleu ngon bui, suwah samak.
Bui meulatang paléng kutoe, paléng bajeung, dan paléng hana tari. Bui ‘han ék sagai jitheun deuk ngon grah. Makajih, bui kayém jipajôh meuntah droe jih, èk droe jih, dan jijép ‘iek droejih.
Lam meuseutubôh, bui hana jituri ma, hana jituri yah, hana jituri inong, dan hana jituri agam. Asai ka teuka hawa keu ata alah nyan, meurangkasoe jeut, jikeuraphén saja.
Makajih, ureueng nyang hana pakoe haleu hareum, hana pakoe beutôi salah, asai ‘heut jih sampoe, geukheun lagè bui. Nyoe ka gepeusaban ngon bui, maka kabéh lèn paléh manusia nyan.
Kareuna ureueng-ureueng paléng paléh di masa dilè nan jih keutuléh lam Quran. Miseu jih Firaun, Abu Lahap, Abu Jahal, Qarun, Samiri, dan seubagoe jih.
Teuma na beda. Meunyoe pig bitbit hana geuazeub bak uroe dudoe. Teuma meunyo ureueng lagè bui, teuntè keunöng azeub bak uroe akhé.
