Komparatif.ID, Sabang– Panté Pulo Rubiah di Sabang, nakeuh saboh panté nyang ie laôt jih meuleumpah gléh lagè kaca lam jurè meumpleu (pengantin baru). Lam laôt panté nyan, macam bagoe eungkôt tari jimeunari-nari lagè aneuk dara ceudah meu-’èn grôp taloe.
Nibak uroe Seulasa (17/12/2024) beungóh, Komparatif.ID, meujak u Panté Rubiah. Wartawan media nyoe meujak saban lam kawan jurnaléh bansa Aceh nyang jiba lé Otoritas Jasa Keuangan (OJK) Provinsi Aceh.
Awak nyoe ék bôt kawé di leun darat Meunara Merah Putih nibak poh tujôh beungóh. Beungóh nyan ujeuen rinték-rinték. Langèt seupôt, awan itam lagè jimeuhintue di miyup langèt.
Uroe nyan, sigohlom jak u Rubiah, awak nyoe keuneuk kalön bui laôt (dolphin/lumba-lumba) meulangu. Teuma sampoe bôt kawé nyan reulöh lam laôt, meusaboh bui laôt hana deuh.
Kheun sidroe ureueng lam keulawan nyan sira jimeukra, bak hie bui laôt hana jiteubit kareuna ujeuen.
Bôt reulöh nyan hana leupah jipeugöt lé awak keurija bak bôt nyan. Sijeum lheuh nyan, awak nyoe jijak tung lé speed bôt.
Bit gura, bôt kawé nyan hana jipeuna jakèt apông (life jacket) keu ureueng nyang jiangkôt. Miseu teukeudi bôt nyan lham atawa meubalék, ramè nyang “geujak tung” lé Malék Maw’ót. Wak fun’anna jih ban mandum.
Speed boat nyang jak tung awak nyoe, jibalap meutaga lam geulumbang. Lagè lam film Fast and Furios. Ôk awak nyoe nyang agam cöt jibeudöh. Jeuleubab nyang inóng jikupruk angèn meusilak-silak.
Teuka u Rubiah, ban mandum awak nyoe leumik lheuh. Teuduk-duk ateuh kurusi. Na nyang urôt taku sira geureu-öp, na nyang laju jipeusan mi kuah. Na nyang meunan duk, laju jipeusadeu ulè bak mèh.
Sijeum lheuh piyôh hèk, awak nyoe meukeumah lom. Jak sôk pakaian snorkling. Ureueng pandu jireubôh mi instan keu umpeun eungkôt.
Meuban awak nyoe teuka lam ie laôt yang jeureungèh nyan, laju teukhém-khém lom. Imiyup ie laôt that jai eungkôt tari-tari, lagè aneuk dara jak bak walimah (khanduri ureueng kawén).
Bèk neutanyóng pu pu eungkôt nyang na di sinan. Wartawan Komparatif.ID pih hana jiteupu. Keuneuk peugah, ban mandum eungkôt nyan meuleumpah tari, ceudah lagoina. Nyoe kheun awak bulèk, very beautiful!
Eungkôt-eungkôt nyan jilikak hoe nyang galak. Watè jiruwah umpeun lé tukang photo miyup laôt, eungkôt nyan sigra plung ramè-ramè jak meurupah mi reubôh. Watè eungkôt ka meusapat, sigra jiphoto. Ureueng meulangu lam kawan eungkôt, meugaya kiban nyang hawa.
Meujak nom sira kalön eungkôt di Rubiah cit mangat lagoina. Ban mandum ureueng nyang teuka keunan ie muka geuh teuplöh, hana krôt lagè boh kruet.
Padum droe bulèk Taiwan na sit di sinan. Awak nyan lagè sang ka hayeu that. Kön cuma snorkling, tapi na nyang jak diving. Bak hie, watè meurumpök muka ngón ureueng Aceh, lagè na jikeuneuk peugah haba.
Cuma di awak tanyoe laju “sijuk seu-um”. Teumakôt that jipakat peugah haba. Tapi meulikôt awak Taiwan nyan, peugöt khém sira kheun, “ching ch’ong hwa.” Alèh pu arti, hana meutatupu pih. Hahaha.
