Komparatif.ID, Banda Aceh– Polisi Sektor (Bentara Sagoe) Syiah Kuala, Hamèh (30/1/2025) didrop aneuk SMA nyang cabôt sikula. Aneuk SMA nyan jibeureukah lé bentara nibak saboh keudè di Gampông Rukoh, Syiah Kuala, Banda Aceh.
Ule Bentara Sagoe Syiah Kuala Iptu Cut Uya neupeugah awak bentara jibeurangkat jak wét sagoe Syiah Kuala, lheuh awak nyoe apèl di leun kantô.
Meuban teuka nibak saboh keudè di Gampông Rukôh, bentara meukalön padum droe aneuk SMA teungöh jidukduk bak saboeh keudè. Bèk neutanyöng pu jipeulaku nibak keudè nyan. Lagè biasa ju but aneuk mit cabôt sikula.
Aneuk muda tanggông nyan dum na keuneuk plueng nak bèk keunöng drop nibak bentara. Teuma caröng aneuk miet, teuntè caröng ureueng tuha loem.
Ubéna pintô tamöng kajidöng bentara Bak-bak tingkap kana bentara.
Baca: Rupajih Meunoe Cara Bui Asah Gigoe
“Hoe kaneuk plueng lom. Uroenyoe ka kutumè keuh awak kah dum,” kheun sidroe bentara.
“Bèk neudrop, Pak.” kheun aneuk sikula.
“Pu bèkbèk. Kudroep keuh mandum,” kheun bentara sira jipagab awak nyoe.
Pu tanyoeng ie muka aneuk sikula nyan. Lagè buleuen teulat jilôp nibak beungöh uroe. Pucat lagè muka burông teulat woe u kuburan.
Ban mandum aneuk sikula nyan dituléh nan lé bentara, jituléh alamat sikula, dan macam bagoe laén.
Ulè Bentara Syiah Kuala Iptu Cut Uya, neupeugah nibak ureueng meukat bak keudè. Bèk geupeubiyeu aneuk mit cabôt sikula jijak duk bak keudè. Meunyo na aneuk mit hana tamöng sikula jijak duk bak keudè, suwah bithè nibak bentara.
“Nyoena teuka awak nyoe cabôt sikula dan jinak duk keunoe, neubithè bak kamoe. Bèk neupeubiyeu awak nyoe cabôt sikula,” kheun Iptu Cut Uya.
Aneuk sikula nyan dum, lheuh dituléh nan lé bentara, jijak intat u sikula lom. Lheuh jijôk bak gurè, awak bentara jijak woe u kantô droejih.
