Komparatif.ID, Sidoarjo– Presiden Persiraja Banda Aceh Nazaruddin Dek Gam, dipèh mèh meutaga di keu awak sipak bhan nyang keuneuk lawan Deltras FC nibak Minggu (26/1/2025).
Watè nyan Dek Gam jipeugah Persiraja hanjeut talô lawan Deltras. Awak Persiraja bèk lagè aneuk manok hana nang (hana ma-red).
Beut: Bang Din Yu Jak Lakè, Rupajih Rohana Meugatip Ngon Teungku Leman
“Kadang suwah tapeugöt meunan, alhamdulillah uroe nyoe meunang,” tuléh Dek Gam nibak bintéh Instagram, Minggu (26/1/2025) lheuh Persiraja jipingkom Deltras FC 3-2.
Jimeu’en di Geulanggang Delora Delta Sidoarjo, aneuk-aneuk Persiraja dimeu’en boh bhan sép meutaga. Aneuk mit nyang jinoe jilatih lé Achyar Ilyas jimeu’en boh bhan lagè hana masalah sapu.
Tam tum jisipak bola, lagè sang teungoh jimeu’en di Lampineung.
Han trép lheuh wasit jiyup prip phôn, awak nyoe sigra jisipak bhan lagè na laju. Aneuk mit Deltras jipeugöt keu ayeum jih. Bak minet keu 14, Vivi Afrizal leupah jipeulôp sineuk lam gôn Deltras. Gôl nyan keumah jisipak lé Vivi lheuh jipeuguna eumpeun nyang dijôk lé Matheus Machado.
Adak ka meunang sineuk, aneuk mit Persiraja hana jipeukeundô jiseurang Deltras. Bak minèt keu 34, Misftahul Hamdi keumah jipeulôp bola sineuk teuk lam gôn Deltras. Boh bhan jisipak dari lua kotak pinalti, jilôp röt blah wie gôn.
Awak Deltras barô leupah jibalah bak babak keudua. Dua minèt lheuh prip babak keudua jiyup lé wasit, Arthur jiepulôp boh bhan lam gôn Persiraja.
Ban dua tim jinoe ka saban teuga. Meukachuk jimeu’en boh bhan. Adak pih golom lagè bak liga Eropa, tapi hana glak takalön. Bak minèt keu-80, R. Syahwali nyang gantoe Seko, leupah jipeulôp sineuk teuk lam gôn Persiraja.
Até Achyar Ilyas ka lucôt bacut. Pulom Presiden Dek Gam jipèh mèh ngon meutaga sigohlom awak nyoe tren u geulanggang Gelora Delta.
Lam keuadaan 2-2, ban dua tim saban-sabang lagè ban lheuh jijèp ie peundang uteuen. That meunapsu keu meunang. Pulom Persiraja, awak nyoe hareum woe ngon powén sineuk.
Nibak minèt keu 90+2, Matheus Machado leupah dipr’ik gôn Deltras. Aneuk muda nyan nyang dari awai memang hayeu bak jimeu’en, jeut keu ureueng bantu Persiraja meutumè lhè powén kali nyoe.
Presiden Persiraja Dek Gam khém meutaga. Ban mandum bahagia.
Lheuh meunang nyan, neuduk Persiraja bak grup X babak 8 rayek Liga 2 ka santeut lom ngon PSPS Pekanbaru, PSIM Yogyakarta. Ban mandum awak nyan kana lhè powén sapoe.
