Komparatif.ID, Banda Aceh– Bang Din nyang ka peut thôn geuduk sidroe, lheuh tan binoe geuh, hawa meukawén lom. Hawa nyan teuka keulayi, lheuh meureumpök Rohana, sidroe inöng balè nyang lakoe geuh geuwoe bak Allah dua thôn ka u likôt.
Ureueng nyan dua meureumpök bak seunujôh Toké Lah, rakan saboh keurija awai bak saboh kantô pemerintah.
Calitra nyoe geurawi lé sidroe rakan jép kupi Komparatif.ID, lhè uroe nyang ka u likôt. Kana idin tuléh seubab nyang poe riwayat pih ka kayém geupeugah bak gob sira jép kupi.
Gisa keulayi bak calitra Bang Din dan Kak Rohana. Lheuh meureumpök bak seunujôh Toké Lah, ureueng nyan na meureupök lom padim gö teuk.
Bak saboh uroe Bang Din geupeusampoe asoe até geuh bak Kak Rohana. Kheun Kak Rohana. “Meunyoe bit galak neuh keu lôn, neujak u rumoh neuba ureueng tuha gampông.”
Ban geudeungo nyan, Bang Din seunang that. Rap hana geutumè woe u rumoh jak peugah bak aneuk. Sira geuwoe gob nyan teuseuh’èh-seuh’eh sipanyang taloe rauh.
Di rumoh hana teunang meubacut pih. Geubuka hapé, neunonton film, geunonton ceuramah, dan geubuka album foto watè gobnyan meugatip ngön inöng geuh nyang kageuwoe bak Allah.
Malam nyan gob nyan rumèh that. Pu nyang geukalön seunang geuh. Geukalön cicak bak bintéh, nyan pih deuh lucu. Geukalön manoek lam geureupôh, nyan pih deuh tari ban mandum. Geubuka Facebook Kak Rohana, haté Bang Din lagè lam kulkas. Leupi haté geuh, meus’aps’ap lantông geuh. Lagè lintah situk musém ujeuen.
Baca juga: Peubloe Sabè Lam Lampôh Sawét, 2 Droe Awak Nisam Jibeureukah Polisi
Lheuh geutimang-timang. Akhéjih geujak peugah hai nyan bak Teungku Leman, rakan saboh sikula jameun. Teungku Leman meuturi sit ngon Kak Rohana, sebab saboeh bale beut awai. Kak Rohana adék glah dan murid Teungku Leman bak balè beut.
“Teuma keupu lôn jak teuma? Kön na ureueng tuha gampông,” jaweub Teungku Leman.
“Nyoe cah rauh dilè, Teungku. Droeneuh jak cah sang muslihat,” kheun Bang Din.
Lhè uroe, sigoe Jumeu’at, sibuleuen, hana haba sapu dari Teungku Leman. Geukeuneuk tanyöng bak hie hana mangat. Sang-sang Bang Din hawa that meukawén lom. H’an geutanyöng, hana mangat até geuh.
Pulom ka padum trép Kak Rohana hana haba sapue. Lagè lagè ka tabeu meunan. Na geuchat padum göe, hana geubalah lé Kak Rohana. Peujeut meunan? Pu kana laén? Até Bang Din hana tateu’oh ban ka. Meujampu lawök lagè gulè pliek bak khanduri.
Bak saboh beungöh, Bang Din teukeupak. Até geuh sang ancô lagè Hiroshima keunöng bom atôm Sekutu. Jantông geuh lagè phak luyak. Teuklik sidroe geuh lam kama lheuh seumayang Suboh.
Lam grub WA Sahabat Religi yang gob nyan admin, teuka haba bahwa Teungku Leman dan Kak Rohana kalheuh meugatip bak kantô kawaket.
“Taharap keu pageu, pageu pajôh padé. Taharap keu jantông, jantông nyang thôk haté,” kheun Bang Din bak drogeuh.
Hana geusangka Teungku Leman jeut keu pageu pajôh padé. Hana geusangka Teungku Leman teuka até geukaleung gobnyan röt likôt. Hana geusangka Teungku Leman jeut keu tuba lam peukara nyan.
“Allah haté lôn jiculok jarôm. Peuja that ya Allah. Sakét hana meupat peugah.”
Pakön Kak Rohana geutém ngön Teungku Leman? Meuno calitra jih. Watè Teungku Leman jak cah rauh, ureueng nyan dua meurawi kisah watè jak beut awai. Soe galak keu soe. Soe teungku nyang karismatik, soe nyang agak kha, soe nyang “calm down”. Teungku Leman ditamöng lam kategori teungku calm down, ramè aneuk inöng nyang galak keu gobnyan. Adak pih teungku sirap, Teungku Leman caröng, surah göt, hana p’iep rukok, rapi, dan göt sue.
“Jadi, kakak kelas di dayah yang banyak dikagumi, ya Teungku Sul,” kheun Rohana ngui basa toko.
“Hehehe, ada-ada saja, Adinda ni,” jaweub Teungku Leman sira geukhém.
Lheuh ramah tamah bacut sahoe. Teungku Leman geupeusampoe meukeusud geujak u rumoh Rohana.
Trép bacut geuseuôt lé Kak Rohana. Ureueng balè lhè boh aneuk nyan, teuim bak geuduk.
“Pakön taim? Nyoe tatém peugah tém, nyoe h’an peugah h’an. Bèk meugantung Bang Din,” kheun Teungku Leman.
“Hôm hai,Teungku Sul. Adoe neuh nyoe hana that meukeunöng cit keu Bang Din. Gobnyan göt, cuma hôm hai. Sang-sang, golom jikheun jeut lé até lôn.”
“Ôh meunan. Bôh kakeuh meunyoe meunan. Ulôn peusampoe bak gob nyan.”
Kak Rohana geuanggôk. Panyang watè gautarék nap’hah.
“Teuma Teungku Sul hana lé niet meurumoh tangga, lheuh Kak Ni meulinggai?” Kheun Kak Rohana.
Teungku Leman teukeujet ban geudengoe nyan. Pu meukeusud Rohana?
“Niet teuntè na. Teuma sampoe inohat gohlom na deuh.” Kheun gob nyan sira geujép kupi nyang ka tinggai bubôk. Teungku Leman ka mulai salting.
“Lôn peugah ju jeut. Lôn keudroe na hawa meukawén lom. Lintô beunalah ilmé nyang sép keu taibadat. Beugeuteu’oh peurunoe lôn lam bhah agama.” Kheun Kak Rohana.
Teungku Leman teuim lagè teupeulen panyöt. Hana trép lheuh nyan, Teungku Leman lakè idin meujak woe.
Sipanyang rauh haté gobnyan hana meu’oh ban. Seubagoe ureueng cah rauh, tugah ka tunai geupubut. Seubagoe ureueng agam nyang katrép sidroe, bak sang Rohana brie signal keu gobnyan.
“Allah, kiban lôn nyoe?”
Peut uroe lheuh nyan, Teungku Leman kirém ureueng cah rauh u rumoh Kak Rohana. Kali nyoe hana meutheun sapat. Kak Rohana laju geulakè beu bagah meugatip.
Nam buleuen lheuh nyan, Bang Din dan Teungku Leman meupakat meurumpök bak keudè kupi. Teungku nyan geulakè meu’ah dan geupeugah lagè na.
“Pakön teuma droneuh hana neupeugah awai?” Kheun Bang Din.
“H’an lôn teujeut,” jaweub Teungku Leman.
